ரஜினியுடன் மோதும் ராஜமவுலி- போட்டி நிகழ்ச்சிக்கு ஏற்பாடு
10/18/2016 2:12:53 PM
ரஜினியை வைத்து ஒரு படமாவது இயக்க வேண்டும் என்பது தனது கனவு என்று சமீபத்தில் தெரிவித்திருந்த இயக்குனர் ராஜமவுலி, தற்போது பிரபாஸ் நடிக்கும் பாகுபலி 2ம் பாகம் இயக்கி வருகிறார். இந்நிலையில் ஷங்கர் இயக்கத்தில் 2.0 படத்தில் நடித்து வருகிறார் ரஜினி. அடுத்த ஆண்டு திரையிட திட்டமிடப்பட்டுள்ள இப்படங்களை ஒரே காலகட்டத்தில் வெளியிடவும் ஏற்பாடு நடக்கிறது. அதற்கு தகுந்தாற்போல் இருதரப்பிலும் போட்டி விளம்பரங்கள் செய்யப்பட்டு வருகிறது. தென்னிந்திய மார்க்கெட்டைவிட வட இந்திய மார்க்கெட்டை குறிப்பாக மும்பை மார்க்கெட்டை பிடிப்பதில் கடும் போட்டி ஏற்பட்டிருக்கிறது.
2.0 படத்தில் ரஜினியின் முதல் போஸ்டர் வரும் 22ம் தேதி மும்பையில் நடக்கவுள்ள மும்பை சர்வதேச திரைப்பட விழாவில் வெளியிடப்படவுள்ளதாக அறிவிக்கப்பட்டுள்ளது. இந்நிலையில் பாகுபலி 2ம் பாகத்தின் போஸ்டரை ஒரு மாத இடைவெளியில் அதாவது நவம்பர் 20ம் தேதி மும்பையில் வெளியிட உள்ளதாக தெரிவிக்கப்பட்டிருக்கிறது. மும்பை மீடியாக்களின் கவனத்தை கவர்வதற்காகவும் இந்த போட்டி முன்னிறுத்தப்படுவதாக தெரிகிறது. இரண்டு நிகழ்ச்சிகளிலும் பிரபல நடிகர், நடிகைகள் கலந்துகொள்வதற்கான ஏற்பாடுகள் நடந்து வருகிறது.
