உள்ளாட்சி தேர்தல் விதிமுறைகள் அறிவிப்பு
9/21/2016 3:25:17 PM
தஞ்சை, -தஞ்சையில் ஊரக உள்ளாட்சி தேர்தலையொட்டி தேர்தல் நடத்தும் அலுவலர்கள், உதவி தேர்தல் நடத்தும் அலுவலர்களுக்கு பயிற்சி முகாம் நடந்தது.இதில் தேர்தல் விதிமுறைகள் குறித்து அளிக்கப்பட்ட விளக்கம்: கிராம ஊராட்சி தலைவர் பதவிக்கும், கிராம ஊராட்சி வார்டு உறுப்பினர் பதவிக்கும் கட்சி அடிப்படையில் இல்லாத தேர்தல் நடத்தப்படும். கட்சி அடிப்படையில் மாவட்ட ஊராட்சி வார்டு உறுப்பினர் பதவி மற்றும் ஊராட்சி ஒன்றிய வார்டு உறுப்பினர் பதவிக்கு தேர்தல் நடத்தப்படும்.
உள்ளாட்சி தேர்தலில் போட்டியிட வாக்காளர் பட்டியலில் வேட்பாளர் பெயர் இருக்க வேண்டும். 21 வயது நிறைவு பெற்றிருக்க வேண்டும். நிர்ணயிக்கப்பட்ட படிவம் 3ல் வேட்புமனு கொடுக்க வேண்டும். ஊராட்சி வார்டு உறுப்பினர் பதவிக்கு ரூ.200 வைப்புத்தொகை, ஊராட்சி தலைவர் பதவிக்கு ரூ.600 வைப்புத்தொகை, ஊராட்சி ஒன்றிய வார்டு உறுப்பினர் பதவிக்கு ரூ.600, மாவட்ட ஊராட்சி வார்டு உறுப்பினர் பதவிக்கு ரூ.1000 வைப்புத்தொகையாக செலுத்த வேண்டும்.
பட்டியல் இனத்தவர்கள் ஊராட்சி வார்டு உறுப்பினர் பதவிக்கு ரூ.100 வைப்புத்தொகை, ஊராட்சி தலைவர் பதவிக்கு ரூ.300 வைப்புத்தொகை, ஊராட்சி ஒன்றிய வார்டு உறுப்பினர் பதவிக்கு ரூ.300, மாவட்ட ஊராட்சி வார்டு உறுப்பினர் பதவிக்கு ரூ.500 வைப்புத்தொகையாக செலுத்த வேண்டும்.ஊராட்சி தலைவர், ஊராட்சி வார்டு உறுப்பினர் பதவிக்கு மாநில தேர்தல் ஆணையத்தால் ஒதுக்கீடு செய்யப்பட்ட சின்னங்கள் மட்டுமே குலுக்கல் முறையில் வேட்பாளர்களுக்கு ஒதுக்கீடு செய்யப்படும்.
இந்த தகவலை கலெக்டர் அண்ணாதுரை தெரிவித்தார்.
