மடோனாவுக்கு சிபாரிசு செய்த விஜய் சேதுபதி
6/9/2025 2:37:00 PM
கே.வி.ஆனந்த் இயக்கத்தில் விஜய் சேதுபதி, டி.ராஜேந்தர் நடிக்கும் படத்தின் ஷூட்டிங் விரைவில் தொடங்க உள்ளது. இந்த படத்தின் கதை கார்ப்பரேட் நிறுவனங்களை சுற்றி நடக்கிறது. நிறுவனத்தில் பணியாற்றும் அதிகாரி வேடத்தில் விஜய் சேதுபதி நடிக்கிறார். நிறுவனங்களுக்கான ஏஜென்ட் வேடத்தில் டி.ராஜேந்தர் நடிக்கிறார். இந்த படத்தில் ஹீரோயின் வேடத்துக்கு பலரது பெயர்கள் பரிசீலனையில் இருந்தது. கதைக்கு துருதுருவென இருக்கும் ஹீரோயின்தான் தேவை என இயக்குனர் ஆனந்த் விரும்பினார். இதனால் நிக்கி கல்ராணி இந்த வேடத்துக்கு பொருத்தமாக இருப்பார் என பலரும் யோசனை தெரிவித்தனர். இந்நிலையில் பட ஹீரோயினாக மடோனா செபஸ்டின் தேர்வாகியுள்ளார்.
இவர் காதலும் கடந்து போகும் படத்தில் விஜய் சேதுபதி ஜோடியாக நடித்தவர். மலையாளத்தில் நடித்துள்ள இவர், காதலும் கடந்து போகும் படம் மூலம்தான் தமிழில் அறிமுகமானார். இந்நிலையில் ஆனந்த் படத்தில் அவர் நடிக்க விஜய் சேதுபதிதான் காரணம் என கிசு கிசு கோடம்பாக்கத்தில் கிளம்பியுள்ளது. ‘நம்ம படத்துக்கு மடோனாதான் சூட்டா இருப்பா’ என விஜய் சேதுபதி ஆனந்திடம் சொன்னதாக கூறப்படுகிறது. காதலும் கடந்து போகும் படம் பார்த்த ஆனந்தும் மடோனா நடிப்பை பார்த்து திருப்தி அடைந்தாராம். இதையடுத்து அவர் ஒப்பந்தமாகியுள்ளார்.ஏற்கனவே ஒரு சில படங்களில் நடிக்க ஐஸ்வர்யாவை விஜய் சேதுபதி சிபாரிசு செய்ததாக கிசு கிசு கிளம்பியது. அதேபோல் தொடர்ந்து பல படங்களில் விஜய் சேதுபதியுடன் ஐஸ்வர்யா நடித்தார். இப்போது அதேபோல் மடோனாவுக்கும் அவர் சிபாரிசு செய்திருப்பதாக கோலிவுட்டில் முணு முணுக்கிறார்கள்.
