கருணாநிதி முதல்வராவது உறுதி காதர் மொய்தீன் பேட்டி
5/2/2025 3:41:35 PM
திருச்சி:மணப்பாறை தொகுதி இந்திய யூனியன் முஸ்லிம் லீக் வேட்பாளர் முகமது நிஜாமை ஆதரித்து கல்லுப்படியில் மாநில தலைவர் காதர்மொய்தீன் வாக்கு சேகரித்தார். பின்னர் அவர் நிருபர்களிடம் கூறியதாவது:தமிழகத்தில் பெரியார் மற்றும் அண்ணா போன்றவர்களின் கொள்கையை தொடர்ந்து சொல்லிக்கொண்டு வருபவர் கருணாநிதியாக மட்டும்தான் இருக்க முடியும்.அதனால்தான் விளம்பரங்களில் கூட அண்ணா, பெரியார் மற்றும் கருணாநிதி, அதன்பின்னர் மு.க.ஸ்டாலின் என்ற முறையில் படங்கள் உள்ளன. ஆனால் அதிமுக விளம்பரங்களில் அப்படி காண முடியாது. ஜெயலலிதாவின் படங்களைத்தான் காண முடியும்.
தமிழகத்தில் சிறுபான்மை மக்களின் உரிமைகளுக்கு கேடயமாய், பாதுகாப்பாய் இருக்க கூடிய ஒரு இயக்கம் திமுக. அதனால்தான் திமுக கூட்டணியில் தொடர்ந்து நீடிக்கிறோம். திமுகவின் தேர்தல் அறிக்கை மக்களிடம் நல்ல வரவேற்பை பெற்றுள்ளது. இது திமுகவினரால் தயாரிக்கப்பட்ட தேர்தல் அறிக்கை அல்ல. மக்களால் தயாரிக்கப்பட்ட தேர்தல் அறிக்கை. இந்த தேர்தல் அறிக்கையின் தாக்கம்தான் தற்போது திமுக வெற்றி பெறும் என்ற நிலையை ஏற்படுத்தி உள்ளது. இந்த தேர்தலில் திமுக கூட்டணி அமோக வெற்றிப்பெற்று கருணாநிதி மீண்டும் முதல்வராக பொறுப்பேற்பது உறுதி.இவ்வாறு காதர்மொய்தீன் கூறினார்.
