பிரதமருக்கு கடிதம் எழுதுவதால் துயரம் களையப்படுகிறதா? தமிழக மீனவர்களை அதிமுக அரசு ஏமாற்றுகிறது கருணாநிதி அறிக்கை
3/15/2016 3:18:10 PM
சென்னை: திமுக தலைவர் கருணாநிதி வெளியிட்டுள்ள அறிக்கையில் கூறியிருப்பதாவது: வந்தாரை வாழவைக்கும் தமிழகத்தை சேர்ந்த மீனவர்கள், இன்னும் எத்தனை காலம் தான் இலங்கை கடற்படையினரை கண்டு அஞ்சி அஞ்சி சாக வேண்டுமோ? தமிழக மீனவர்களை, இலங்கை கடற்படையினர் தொடர்ந்து தாக்குவதும், அச்சுறுத்துவதும், கைது செய்வதும் என்ற மனிதாபிமானமற்ற நடவடிக்கை தொடர் கதையாகவே நீண்டு வருகிறது. இதுபற்றி, நமது மீனவர்கள் கைது செய்யப்படுவது தான் தாமதம், அடுத்த நாளே பிரதமருக்கு நமது முதலமைச்சர் ஒரு கடிதம் எழுதியதாக ஏடுகளுக்கெல்லாம் செய்தி கொடுத்து விடுவார்கள். ஆனால் கடிதத்தால் மீனவர்களின் துயரம் களையப்படுகிறதா என்ன?
மத்திய அரசுக்கோ, பிரதமருக்கோ வெறும் கடிதம் மாத்திரம் இவ்வாறு எழுதி விட்டால் போதுமா? முதல் அமைச்சரோ, மூத்த அமைச்சர்களோ, துறையின் அமைச்சரோ, டெல்லி சென்று இது பற்றி முறையிட வேண்டாமா? 37 எம்.பி.க்கள் இருப்பதால், அதிமுகவின் உதவி பாஜ அரசுக்கு தேவைப்படும் நிலையில், மீனவர் நலனுக்காக, அரசியல் ரீதியாக அழுத்தம் கொடுக்க வேண்டியது தானே? வெறும் கடிதத்தின் மூலமாக தமிழ்நாட்டு மீனவர்களை தமிழக அதிமுக அரசு எப்படியெல்லாம் ஏமாற்றிக் கொண்டிருக்கிறது? இந்தியாவோடு ஒப்பிடும்போது இலங்கை எவ்வளவு சிறிய நாடு? இருந்தாலும் அந்த நாட்டின் கடற்படையினர் செய்யும் அட்டூழியத்திற்கு பெரிய நாடான இந்தியா ஒரு முடிவு கட்ட வேண்டாமா? மனம் இருந்தால் மார்க்கம் உண்டல்லவா?
கூட்டம் நடத்துகிறோம், பேச்சுவார்த்தை நடத்துகிறோம் என்றெல்லாம் சொல்லிக் கொண்டே பிரச்சினைக்கு தீர்வு காணாமல் தள்ளிப் போட்டுக் கொண்டே இருந்தால், மீனவர் வாழ்க்கை என்ன ஆவது? தமிழக மீனவர்கள் 28 பேரை நான்கு படகுகளோடு இலங்கைக் கடற்படை கைது செய்துள்ளது. கடந்த 12ம் தேதி 23 மீனவர்கள் இதே இலங்கை கடற்படையினரால் கைது செய்யப்பட்டார்கள். இதற்கெல்லாம் ஒரு முடிவு வேண்டாமா? மத்திய அரசு இனியும் இதுவரை தாமதித்து வந்ததைப் போல, தாமதிக்காமல் உடனடியாகத் தலையிட்டு தமிழக மீனவர்களின் பிரச்சினைக்கு ஒரு நல்ல தீர்வுகாண உளப் பூர்வமாக உண்மையான முயற்சி எடுக்க வேண்டுமென்று மீண்டும் மீண்டும் வலியுறுத்துகிறேன். இவ்வாறு அறிக்கையில் கூறப்பட்டுள்ளது.
