ஒரே நேரத்தில் தனுஷ்-சிம்புவை இயக்கும் இயக்குனர்
3/15/2016 3:09:56 PM
சிம்பு நடிக்கும் ‘அச்சம் என்பது மடமையடா’ படத்தை இயக்கி வந்தார் கவுதம் மேனன். ‘இது நம்ம ஆளு’ படத்தின் பாடல் காட்சிகளையும், பேட்ச் ஒர்க்கையும் சிம்பு முடிக்க வேண்டி இருந்தது. இதையடுத்து கவுதம் மேனன் படத்திலிருந்து பிரேக் எடுத்துக்கொண்டு அப்படத்தின் பணிகளை முடிக்க சென்றார். இதனால், ‘அச்சம் என்பது மடமையடா’ படப்பிடிப்பை சற்று தள்ளிப்போட வேண்டிய சூழல் எழுந்தது.‘கொடி’ படத்தில் நடித்து வந்த தனுஷ் அடுத்து வெற்றி மாறனின் ‘வட சென்னை’ படத்தில் நடிக்க உள்ளதாக தகவல் வெளிவந்துகொண்டிருந்தது. அந்த படம் தள்ளிவைக்கப்பட்டது. இதையடுத்து தனது கால்ஷீட்டை கவுதம் மேனனுக்கு ஒதுக்கி தந்தார் தனுஷ். வெற்றி மாறன் படம் தள்ளிவைக்கப்பட்டது சிலருக்கு ஷாக்காகவும், கவுதம் மேனன் படத்தில் தனுஷ் நடிக்கிறார் என்பது சிலருக்கு ஆச்சர்யமாகவும் இருந்தது. தற்போது கவுதம் மேனன் இயக்கும் ‘என்னை நோக்கி பாயும் தோட்டா’ படப்பிடிப்பில் நடித்து வருகிறார் தனுஷ். இதற்கிடையில் ‘இது நம்ம ஆளு’ பணிகளை முற்றிலுமாக முடித்துவிட்டு சிம்பு திரும்பியதும், ‘அச்சம் என்பது மடமையடா’ படப்பிடிப்பையும் நடத்த கவுதம் மேனன் திட்டமிட்டிருக்கிறார். இதில் தனுஷூக்கு ஜோடியாக புதுமுக ஹீரோயின் நடிக்கிறார்.
