பிஎன்பி பாரிபா ஓபன்; டாரியா கசட்கினா அசத்தல்
3/11/2025 2:58:48 PM
இந்தியன்வெல்ஸ்: பிஎன்பி பாரிபா ஓபன் டென்னிஸ் போட்டியின் முதல் சுற்றில் ரஷ்ய வீராங்கனை கசட்கினா, 2 முறை சாம்பியனான டேனியலா ஹன்டுசோவாவை வென்றார். அமெரிக்காவில் இந்தியன் வெல்ஸ் நகரில் பிஎன்பி பாரிபா ஓபன் டென்னிஸ் போட்டியில் முதல் சுற்று ஆட்டங்கள் நடந்து வருகிறது. ஆடவர் ஒற்றையர் முதல் சுற்றில் பிரான்ஸ் வீரர் நிகோலஸ் மாகுட், அர்ஜென்டினாவின் ரென்சோ ஓலிவோவை எதிர் கொண்டார். நேர்த்தியான சர்வீஸ்களை போட்ட நிகோலஸ் மாகுட், 6-2, 6-4 என நேர் செட்களில் ஓலிவோவை தோற்கடித்து அடுத்த சுற்றுக்கு முன்னேறினார். நெதர்லாந்து வீரர் ராபின் ஹாசே 6-3, 6-4 என்ற செட்களில் அர்ஜென்டினாவின் டியகோ ஷ்வாட்ஸ்மேனை தோற்கடித்தார்.
அர்ஜென்டினா வீரர் லியனார்டோ மேயர், ஆஸி., வீரர் சாம் குரோத்துடன் பலப்பரீட்சை நடத்தினார். சாம் குரோத் 5 ஏஸ் சர்வீஸ்களை வீசிய போதிலும், அவரால் தனது சர்வீஸ் கேம்களை காப்பாற்றிக் கொள்ள முடியவில்லை. லியனார்டோ மேயர் 6-4, 6-3 என்ற செட்களில் சாம் குரோத்தை வென்று 2ம் சுற்றுக்குத் தகுதி பெற்றார். பிரான்செஸ் டியபோ(அமெரிக்கா), குய்டோ பெல்லா(அர்ஜென்டினா), ஆண்ட்ரே குஸ்னட்சோவ் (ரஷ்யா), போர்னோ கோரிக்(குரோஷியா), நிகோலஸ் அல்மாக்ரோ (ஸ்பெயின்) ஆகியோர் முதல் சுற்றில் வெற்றி பெற்றுள்ளனர்.
மகளிர் ஒற்றையர் பிரிவு முதல் சுற்றில் அமெரிக்க வீராங்கனை லாரென் டேவிஸ் 6-2, 6-4 என நேர் செட்களில் ஜப்பான் வீராங்கனை நவோ ஹிபினோவை தோற்கடித்தார். ஸ்லொவாகிய வீராங்கனை மக்டலேனா ரைபாரிகோவா 7-6(3), 6-2 என நேர் செட்களில் பிரிட்டன் வீராங்கனை லாரா ராப்சனை வென்றார். பியூர்டோரிகா வீராங்கனை மோனிகா பியூக் 6-1, 6-2 என்ற செட்களில் குரோஷிய வீராங்கனை மிர்ஜானா லூசிக்கை வென்றார். ரஷ்ய வீராங்கனை டாரியா கசட்கினா, பிஎன்பி பாரிபா ஓபனில் 2 முறை சாம்பியன் பட்டம் வென்றவரான ஸ்லொவாகியாவின் டேனியலா ஹன்டுசோவாவை 6-2, 6-4 என நேர் செட்களில் வென்று 2ம் சுற்றுக்கு முன்னேறினார்.
