ஆஸி. சூப்பர் வெற்றி தொடரையும் வென்றது
3/10/2025 3:10:35 PM
கேப்டவுன்: தென் ஆப்பிரிக்கா- ஆஸ்திரேலியா அணிகள் இடையே 3வது மற்றும் கடைசி டி20 போட்டி கேப்டவுனில் நேற்று இரவு நடந்தது. டாஸ் வென்ற தெ.ஆ. முதலில் பேட்டிங் செய்தது. அதிரடி வீரர் டிவில்லியர்சுக்கு பதில் அம்லா அணியில் சேர்க்கப்பட்டார். அம்லா- டி காக் ஜோடி முதல் விக்கெட்டிற்கு 4 ஓவரில் 47 ரன் எடுத்தது. டி காக் 13 பந்தில் 25 ரன் எடுத்து ஆட்டம் இழந்தார். பின்னர் வந்த கேப்டன் டு பிளசிஸ் 4, ரோசோவ் 16 ரன்னில் ஆட்டம் இழக்க, மில்லர் 16 பந்தில் 2 பவுண்டரி, 2 சிக்சருடன் 30 ரன் விளாசினார். 20 ஓவரில் தெ.ஆ. 4 விக்கெட் இழந்து 178 ரன் குவித்தது. அம்லா ஆட்டம் இழக்காமல் 62 பந்தில் 8 பவுண்டரி, 4 சிக்சருடன் 97 ரன் விளாசினார்.
பின்னர் களம் இறங்கிய ஆஸி.யின் கவாஜா 33 (25 பந்து), வாட்சன் 42 (27 பந்து) ரன்னில் வெளியேற கேப்டன் ஸ்மித் 26 பந்தில் 44 ரன்னும், வார்னர் 33 ரன்னும் (27 பந்து) எடுத்தனர். 19.2 ஓவரில் ஆஸி. அணி 4 விக்கெட் இழந்து 181 ரன் எடுத்து 6 விக்கெட் வித்தியாசத்தில் வெற்றி பெற்றது.முதல் போட்டியில் தெ.ஆ.வும், 2வது போட்டியில் ஆஸி.யும் வெற்றி பெற்றிருந்த நிலையில், இந்த வெற்றி மூலம் 2-1 என தொடரை ஆஸி. கைப்பற்றியது. ஆட்டநாயகன் விருதை அம்லாவும், தொடர் நாயகன் விருதை வார்னரும் பெற்றனர்.
