லாஸ் ஏஞ்சல்சில் கோலாகலம் ‘மேட் மேக்ஸ்’ படத்துக்கு 6 ஆஸ்கர் சிறந்த நடிகருக்கான விருதை லியோனார்டோ பெற்றார்
2/29/2016 2:38:38 PM
லாஸ் ஏஞ்சல்ஸ்: திரை துறையில் உயரிய விருதாக கருதப்படும் ஆஸ்கர் விருது இன்று வழங்கப்பட்டது. ‘மேட் மேக்ஸ்: பியூரி ரோடு’ படம் 6 விருதுகளை தட்டி சென்றது. சிறந்த நடிகருக்கான விருதை ‘ரெவனன்ட்’ படத்தில் நடித்த லியார்னார்டோ டிகாப்ரியோ பெற்றார்.திரைப்பட உலகில் மிகவும் மதிப்புமிக்க விருதாக ஆஸ்கார் கருதப்படுகிறது. இவ்விருதை ஒருமுறையாவது வாங்கிவிட வேண்டுமென்பது திரைக்கலைஞர்களின் கனவாக இருக்கிறது. சிறந்த படம், நடிகர், நடிகை, ஒளிப்பதிவு, திரைக்கதை, எடிட்டிங், ஒப்பனை உள்ளிட்ட பிரிவுகளின் கீழ் விருது வழங்கப்படுகிறது. இந்நிலையில், 88வது ஆஸ்கார் விருது வழங்கும் விழா அமெரிக்காவின் லாஸ் ஏஞ்சல்ஸில் உள்ள ஹாலிவுட்டில் இன்று தொடங்கியது.
நடிகர், நடிகைகள், தொழில்நுட்ப கலைஞர்கள் என ஏராளமானோர் விழாவில் பங்கேற்றனர். விழாவில் கலந்துகொண்ட பாலிவுட் நடிகை பிரியங்கா சோப்ராவுக்கு பலத்த வரவேற்பு இருந்தது. தங்களுக்கு விருது கிடைக்கும் என கலைஞர்கள் ஆவலுடன் எதிர்பார்க்கப்பட்ட நிலையில், விருதுகள் அறிவிக்கப்பட்டன. ‘மேட் மேக்ஸ்: பியூரி ரோடு’ படத்துக்கு எடிட்டிங், ஆடை வடிவமைப்பு, சவுண்ட் எடிட்டிங், தயாரிப்பு வடிவமைப்பு, சவுண்ட் மிக்ஸிங், சிறந்த மேக்கப் என 6 விருதுகள் கிடைத்தன.‘பிரிட்ஜ் ஆப் ஸ்பைஸ்’ படத்தில் சிறப்பாக நடித்த மார்க் ரைலன்ஸ் சிறந்த துணை நடிகருக்கான விருதை தட்டி சென்றார்.
‘டேனிஸ் கேர்ள்’ படத்தில் நடித்த அலிசியா விகந்தருக்கு சிறந்த துணை நடிகைக்கான விருது கிடைத்தது. ‘ஸ்பாட் லைட்’ படம் சிறந்த திரைக்கதைக்கான விருதை பெற்றுள்ளது. சிறந்த அனிமேஷன் படத்துக்கான விருது, ‘இன்சைட் அவுட்’ படத்துக்கும், சிறந்த டாக்குமென்ட்ரி படத்துக்கான விருது ‘எமி’ என்ற படத்துக்கும் கிடைத்துள்ளது. சிறந்த வெளிநாட்டு படத்துக்கான பிரிவில் ஹங்கேரியில் தயாரிக்கப்பட்ட ‘சன் ஆப் சால்’ படத்துக்கு கிடைத்துள்ளது.
பெரிதும் எதிர்பார்க்கப்பட்ட ‘ரெவனன்ட்’ படத்தில் சிறப்பான நடிப்பை வெளிப்படுத்திய லியானார்டோ டிகாப்ரியோ சிறந்த நடிருக்கான விருதை தட்டி சென்றார். ‘ரெவனன்ட்’ படத்துக்காக சிறந்த இயக்குநர் விருதை அலிஜென்ட்ரோ இன்னாரிட், சிறந்த ஒளிப்பதிவுக்கான விருதை இமானுவேல் லுபெஸ்கி ஆகியோர் பெற்றனர்.‘ரூம்’ படத்தில் சிறப்பாக நடித்த பிரி லார்சன் சிறந்த நடிகைக்கான விருதை தட்டி சென்றார். சிறந்த இசையமைப்பாளர் விருதை ‘தி ஹேட்புல் எயிட்’ படத்துக்கு இனியோ மொரிகான் பெற்றார். சிறந்த படத்துக்கான விருது ‘ஸ்பாட்லைட்’ படத்துக்கு வழங்கப்பட்டது.
