சீன ஓபன் டென்னிஸ் வீனஸ் அதிர்ச்சி தோல்வி
10/7/2025 2:40:48 PM
பீஜிங்: சீன ஓபன் டென்னிஸ் தொடரின் 2ம் சுற்றில் முன்னாள் உலக நம்பர் 1 வீராங்கனை வீனஸ் வில்லியம்ஸ் தோல்வி அடைந்தார்.சீன தலைவர் பீஜிங்கில் சீன ஓபன் டென்னிஸ் போட்டிகள் நடந்து வருகிறது. மகளிர் ஒற்றையர் 2ம் சுற்று ஆட்டத்தில் 6ம் நிலை வீராங்கனையான செர்பியாவின் அனா இவானோவிக், அமெரிக்காவின் வீனஸ் வில்லியம்ஸை எதிர் கொண்டார். இந்த ஆட்டத்தில் இவானோவிக் அசத்தலாக ஆடி, டை பிரேக்கரில் முதல் செட்டை வென்றார். 2வது செட்டில் வீனஸ் தடுமாறியதை பயன்படுத்திக் கொண்ட இவானோவிக், வீனஸ் வில்லியம்ஸின் சர்வீஸ் கேமை பிரேக் செய்து செட்டை கைப்பற்றினார். இந்த ஆட்டத்தில் அனா இவானோவிக் 7-6 (3), 6-2 என நேர் செட்களில் வெற்றி பெற்று அடுத்த சுற்றுக்கு முன்னேறினார்.
அமெரிக்க ஓபன் சாம்பியனான இத்தாலி வீராங்கனை பிளாவியா பென்னட்டா 2ம் சுற்றில் ஆஸ்திரேலியாவின் சமந்தா ஸ்டோசரை எதிர் கொண்டார். அனுபவ ஆட்டத்தின் மூலம் முதல் செட்டை வென்று அதிர்ச்சி கொடுத்தார் ஸ்டோசர். இதன் பின்னர் சுதாரித்து ஆடிய பென்னட்டா தொடர்ச்சியாக ஸ்டோசரின் சர்வீஸ் கேம்களை முறியடித்து அடுத்த 2 செட்களையும் எளிதில் கைப்பற்றினார். இந்த ஆட்டத்தில் பென்னட்டா 3-6, 6-0, 6-4 என்ற செட்களில் ஸ்டோசரை வென்றார்.மகளிர் பிரிவில் பிரபல வீராங்கனைகளான டிமியா பாக்சின்ஸ்கி, ஆண்ட்ரே பெட்கோவிக், ஏஞ்சலீக் கெர்பர், சாரா எர்ரானி, பெத்தானி மேடக் சாண்ட்ஸ், கரோலின் ஓஸ்னியாக்கி, ஸ்வெட்லானா குஸ்னட்சோவா ஆகியோரும் 2ம் சுற்றில் வெற்றி பெற்றுள்ளனர்.ஆடவர் ஒற்றையர் ஆட்டத்தில் முதல் சுற்றில் உலகின் நம்பர் 1 வீரரான நோவாக் ஜோகோவிச், சிமோன் பொலேலியை எதிர் கொண்டார். இந்த ஆட்டத்தில் ஜோகோவிச் அசத்தலாக ஆடி 6-1, 6-1 என நேர் செட்களில் பொலேலியை வீழ்த்தினார். முதல் சுற்றில் பிரபல வீரர்கள் ரபேல் நடால், போக்னினி, ஜான் இஸ்னர் ஆகியோரும் வெற்றி பெற்றுள்ளனர்.
