கொரிய ஓபன் டென்னிஸ் ஸ்டீபன்ஸ் அதிர்ச்சி தோல்வி
9/26/2015 12:35:02 PM
சியோல்: கொரிய ஓபன் டென்னிஸ் காலிறுதியில் அமெரிக்க வீராங்கனை ஸ்டீபன்ஸ் அதிர்ச்சிகரமான முறையில் தகுதி நிலை வீராங்கனையிடம் தோல்வி அடைந்தார்.சியோல் நகரில் நடந்து வரும் கொரிய ஓபன் டென்னிஸ் தொடரில் காலிறுதி ஆட்டங்கள் நேற்று நடந்தது. தகுதி நிலை வீராங்கனையான பெலாரஸ் நாட்டின் அலெக்சாண்ட்ரா சாஸ்னோவிச்சுடன், மூன்றாம் நிலை வீராங்கனையான அமெரிக்காவின் ஸ்லோன் ஸ்டீபன்ஸ் காலிறுதியில் மோதினார். துல்லியமான சர்வீஸ்களின் உதவியால் அலெக்சாண்ட்ரா சாஸ்னோவிச், ஸ்டீபன்ஸை திணற வைத்தார்.
ஸ்டீபன்சின் சர்வீஸில் கிடைத்த 11 பிரேக் பாயிண்ட் வாய்ப்புகளில் 5 வாய்ப்புகளை சாஸ்னோவிச் கைப்பற்றினார். இந்த ஆட்டத்தில் சாஸ்னோவிச் 6-3, 6-2 என நேர் செட்களில் ஸ்லோன் ஸ்டீபன்ஸை தோல்வியடையச் செய்தார். சாஸ்னோவிச் அரையிறுதியில் இரண்டாம் நிலை வீராங்கனையான அன்னா கரோலினா ஷ்மில்டோவாவை எதிர் கொள்ள உள்ளார். ஷ்மில்டோவா காலிறுதியில் 6-4, 3-6, 6-1 என்ற செட்களில் ஜெர்மனி வீராங்கனை மோனா பார்த்தெலை வென்றது குறிப்பிடத்தக்கது.
முதல் நிலை வீராங்கனையான இரினா கார்மெலா பெகு, காலிறுதியில் ஸ்வீடன் வீராங்கனை ஜொகனா லார்சனின் கடும் எதிர்ப்பை எதிர்கொள்ள நேரிட்டது. இதில் கார்மெலா பெகு 6-4, 7-5 என்ற செட்களில் வென்றார். அவர் அரையிறுதியில் பெல்ஜிய வீராங்கனை அலிசன் வான் உத்வான்க்குடன் மோத உள்ளார். உத்வான்க் காலிறுதியில் 6-1, 4-6, 6-2 என்ற செட் கணக்கில் ரஷ்ய வீராங்கனை அலிசாவெடா குளிசென்கோவாவை வீழ்த்தியது குறிப்பிடத்தக்கது. ஜான்கோவிச் அபாரம்சீனாவில் நடந்து வரும் குவான்சூ சர்வதேச டென்னிஸ் போட்டியில் நேற்று அரையிறுதி ஆட்டங்கள் நடந்தது. செர்பிய வீராங்கனை ஜெலினா ஜான்கோவிச், பெல்ஜியம் வீராங்கனை யானினா விக்மேயருடன் அரையிறுதியில் மோதினார்.
இதற்கு முன் இருவரும் மோதிய 8 போட்டிகளில் தொடர்ச்சியாக விக்மேயர் வென்றுள்ளார் என்பதால், நேற்றைய போட்டியிலும் அவரே ஆதிக்கம் செலுத்துவார் என்று எதிர்பார்க்கப்பட்டது. ஆனால், விக்மேயர் கடும் போராட்டத்தை வெளிப்படுத்தினாலும் அவரால் வெற்றிக்கனியை பறிக்க முடியவில்லை. மூன்றாவது செட்டின் 11வது கேமில் 3 புள்ளிகள் பின்தங்கியிருந்த நிலையில் இருந்து மீண்டு வந்து ஜான்கோவிச் வெற்றி பெற்றார். 6-3, 2-6, 7-5 என்ற செட்களில் ஜான்கோவிச் வென்று இறுதிப்போட்டிக்கு முன்னேறினார். மற்றொரு அரையிறுதியில் செக் குடியரசு வீராங்கனை டெனீசா அல்லெர்டோவா 7-5, 6-2 என நேர் செட்களில் மூன்றாம் நிலை வீராங்கனையான இத்தாலியின் சாரா எர்ராணியை வீழ்த்தி இறுதிப்போட்டிக்குத் தகுதி பெற்றார்.
