நியூசி.யுடன் முதல் ஒன் டே; தென் ஆப்பிரிக்கா சூப்பர் வெற்றி
8/20/2015 2:38:59 PM
செஞ்சூரியன்: நியூசிலாந்து அணி தென் ஆப்பிரிக்காவில் சுற்றுப்பயணம் மேற்கொண்டுள்ளது. இரு அணிகள் இடையே 3 ஒரு நாள் போட்டி கொண்ட தொடரின் முதல் ஆட்டம் நேற்று செஞ்சூரியன் மைதானத்தில் நடந்தது. டாஸ் வென்ற நியூசிலாந்து முதலில் பந்து வீசியது. தென் ஆப்பிரிக்க துவக்க வீரர் வான்விக் 16 ரன்னில் வெளியேற, ஆம்லாவுடன், ரைலீ ரிசவ் ஜோடி சேர்ந்தார். இருவரும் நியூசி. பந்து வீச்சை அபாரமாக எதிர்கொண்டு ரன் குவித்தனர். அணியின் ஸ்கோர் 231 ஆக இருந்த போது ரிசவ் 89 ரன்னில் (112 பந்து 6 பவுண்டரி, 3 சி்க்சர்) ஆட்டம் இழந்தார். இருவரும் 2வது விக்கெட்டிற்கு 185 ரன் குவித்தனர். அடுத்து வந்த கேப்டன் டிவில்லியர்ஸ் 9 ரன்னில் வெளியேறினார். மறுபுறம் சிறப்பாக ஆடி சதம் விளாசிய ஆம்லா 124 ரன் குவித்து (126 பந்து, 13 பவுண்டரி, 3 சிக்சர்) மில்னி பந்தில் போல்டானார். 50 ஓவர் முடிவில் தென்ஆப்பிரிக்கா அணி 7 விக்கெட் இழப்பிற்கு 304 ரன் குவித்தது.பின்னர் கடின இலக்குடன் களம் இறங்கிய நியூசி.யின் துவக்க வீரர் ரோஞ்சி ஒரு ரன்னில் ஸ்டெயின் பந்தில் ஆட்டம் இழக்க, கேப்டன் வில்லியம்சனுடன் லதாம் ஜோடி சேர்ந்தார். இருவரும் இணைந்து 2வது விக்கெட்டிற்கு 104 ரன் சேர்த்த நிலையில், வில்லியம்சன் 47 ரன்னிலும், லதாம் 60 ரன்னிலும் ஆட்டம் இழந்தனர். பின்னர் வந்த கப்தில் 25, நீஷாம் 41, முன்றோ 33 ரன்னில் வெளியேற நியூசி. அணி 48.1 ஓவரில் 284 ரன்னுக்கு ஆல் அவுட் ஆனது. இதனால் தென் ஆப்பிரிக்கா 20 ரன்னில் வெற்றி பெற்றது. இந்த வெற்றியின் மூலம் உலக கோப்பை அரையிறுதி தோல்விக்கு தெ.ஆ. பழி தீர்த்துக் கொண்டது. சதம் விளாசிய ஆம்லா ஆட்டநாயகன் விருது பெற்றார்.
