பெண் டாக்டர், அதிமுக கவுன்சிலரை தொடர்புபடுத்தி வாட்ஸ் அப் வைரல்: அதிமுக செயலாளர் கைது
1/29/2020 3:24:56 PM
லால்குடி: பெண் டாக்டர், அதிமுக கவுன்சிலரை தொடர்புபடுத்தி வாட்ஸ் அப்பில் பரப்பிய அதிமுக செயலாளர் கைது செய்யப்பட்டார். திருச்சி மாவட்டம் லால்குடி பச்சாம்பேட்டையை சேர்ந்தவர் குணசீலன். இவர் அதிமுக முன்னாள் ஒன்றிய செயலாளர். சமீபத்தில் நடைபெற்ற உள்ளாட்சி தேர்தலில் போட்டியிட குணசீலனுக்கு சீட் வழங்கப்படவில்லை. இதனால் ஏமாற்றம் அடைந்த குணசீலன், திருமணமேடு எசனைகோரை 17வது ஊராட்சி ஒன்றிய வார்டில் கவுன்சிலர் பதவிக்கு சுயேட்சையாக போட்டியிட்டு வெற்றிப்பெற்றார். இந்த தேர்தலில் மொத்தம் 21 ஒன்றிய கவுன்சிலர் வார்டில் திமுக 10 இடங்களையும் அதிமுக கூட்டணி 8 இடங்களையும், குணசீலன் உள்பட சுயேட்சைகள் 3 இடங்களையும் கைப்பற்றினர்.
லால்குடி அதிமுக ஒன்றிய செயலாளர் சூப்பர் நடேசனின் மனைவி இசைவாணி ஆங்கரை ஊராட்சி ஒன்றியத்தில் கவுன்சிலராக வெற்றிப்பெற்று ஊராட்சி ஒன்றிய சேர்மன் தேர்தலில் போட்டியிட்டார். இதில் குணசீலன், திமுக வேட்பாளர் ரவிச்சந்திரனுக்கு வாக்களித்து வெற்றி பெற செய்ததாக கூறப்படுகிறது. அதிமுக கட்சி மேலிடம் தனக்கு சீட் தராத விரக்தியில் அதிமுகவை பழி வாங்கியதாக குணசீலன் மீது கட்சியினர் அதிருப்தி அடைந்தனர். இந்தநிலையில் ஒன்றிய கவுன்சிலர் பதவிக்கு போட்டியிட்ட குணசீலன் வெற்றிப்பெற லால்குடி பூவார் பகுதியை சேர்ந்த அரசு பெண் டாக்டர் பல லட்சம் செலவு செய்ததாக கூறப்படுகிறது.
கவுன்சிலர் குணசீலனையும் அந்த பெண் டாக்டரையும் தொடர்பு படுத்தி வாட்ஸ்அப்பில் அவதுாறு செய்திகள் வெளி வந்தது. இது தொடர்பாக குணசீலன் லால்குடி போலீசில் அளித்த புகார் மனுவில், ‘’என்னையும், அரசு பெண் டாக்டரையும் தொடர்பு படுத்தி அதிமுக ஒன்றிய செயலாளர் சூப்பர் நடேசன், வாட்ஸ்அப்பில் அவதூறு பரப்பி உள்ளார்’ என்று தெரிவிக்கப்பட்டுள்ளது. இதன்படி சூப்பர் நடேசன் மீது பெண்ணை சித்தரித்து அவதூறு பரப்பியது உள்ளிட்ட 3 பிரிவுகளின் கீழ் வழக்குப்பதிவு செய்து கைது செய்தனர்.
