டெல்லி சட்டசபை தேர்தல் பிரசாரத்திற்கு நட்சத்திர பேச்சாளர் பட்டியலை வெளியிட்டது ஆம் ஆத்மி
1/23/2020 3:02:05 PM
புதுடெல்லி: டெல்லி சட்டசபை தேர்தலில் போட்டியிடும் வேட்பாளர்களை ஆதரித்து பிரசாரம் செய்யும் நட்சத்திர பேச்சாளர்களின் பட்டியலை ஆம் ஆத்மி கட்சி வெளியிட்டுள்ளது. டெல்லி சட்டசபை தேர்தல்கள் நெருங்கி வருவதால், ஆம் ஆத்மி கட்சி நேற்று 39 நட்சத்திர பேச்சாளர்களின் பட்டியலை வெளியிட்டது. இதில், முதலமைச்சர் அரவிந்த் கெஜ்ரிவாலின் பெயர் முதலிடத்தில் உள்ளது. துணை முதல்வர் மணீஷ் சிசோடியா, பஞ்சாப் மாநிலத் தலைவர் பகவந்த் மான், டெல்லி மாநில கன்வீனர் கோபால் ராய், மாநிலங்களவை உறுப்பினர்கள் சஞ்சய் சிங், சுஷில் குப்தா மற்றும் என்.டி குப்தா ஆகியோரின் பெயர்கள் பட்டியலில் உள்ளது.
அமைச்சர்கள் ராஜேந்திர பால் கெளதம், சத்யேந்திர ஜெயின், இம்ரான் உசேன், கைலாஷ் கஹ்லோட் ஆகியோரும் தேசிய தலைநகரின் பல்வேறு பகுதிகளில் பிரசாரம் செய்வார்கள் எனவும் தெரிவிக்கப்பட்டுள்ளது. அங்கு எம்.எல்.ஏ.க்களான ராக்கி பிர்லா, ஸுராபி பரத்வாஜ், ஜர்னைல் சிங், சஞ்சீவ் ஜா, சோம்நாத் பாரதி, அமானத்துல்லா கான் ஆகியோரும் நட்சத்திர பேச்சாளர்கள் பட்டியலில் ஒரு பகுதியாக உள்ளனர். இசை அமைப்பாளர் விஷால் தத்லானியும் ஆம் ஆத்மி கட்சிக்காக பிரசாரம் செய்வார் என அறிவிக்கப்பட்டுள்ளது.
புதுடெல்லி தொகுதியில், முதல்வரும் ஆம் ஆத்மி தேசிய ஒருங்கிணைப்பாளருமான அரவிந்த் கெஜ்ரிவால் 3வது முறையாக போட்டியிடுகிறார். டெல்லி சட்டசபை தேர்தலுக்கான 70 வேட்பாளர்களின் பெயர்களையும் ஆளும் ஆம் ஆத்மி கட்சி அறிவித்துள்ளது. கெஜ்ரிவால் புதுடெல்லி தொகுதியில் இருந்து கடந்த இரண்டு முறை வென்றுள்ளார். மேலும் கடந்த தேர்தல்களில் 70 இடங்களில் 67 இடங்களை வென்று ஆம் ஆத்மி கட்சி மகத்தான வெற்றியை பெற்றது.
