இந்துக்களுக்கு எதிரானவர் கர்நாடக முதல்வர் சித்தராமய்யா : பாஜ தலைவர் அமித்ஷா கடும் தாக்கு
1/11/2025 4:24:10 PM
பெங்களூரூ : கர்நாடக மாநில முதல்வர் சித்தராமய்யா இந்துக்களுக்கு எதிரானவர் என பாஜ தலைவர் அமித்ஷா கடுமையாக விமர்சனம் செய்துள்ளார். கர்நாடகா மாநிலத்திற்கு இந்தாண்டு மே மாத வாக்கில் சட்டசபை தேர்தல் நடக்க உள்ளது. தற்போது இங்கு முதல்வர் சித்தராமய்யா தலைமையில் காங்கிரஸ் ஆட்சி நடைபெற்று வருகிறது. இதற்கு முன்பு எடியூரப்பா தலைமையில் பாஜ ஆட்சி இருந்தது. இழந்த ஆட்சியை மீண்டும் பிடிக்க பா.ஜ. வியூகம் வகுத்து வருகிறது. கர்நாடகாவில் சமீபத்தில் இந்து பிரமுகர்கள் வரிசையாக கொல்லப்பட்டு வருகின்றனர். இதற்கு பா.ஜ. கண்டனம் தெரிவித்து வருகிறது.
இந்நிலையில் கட்சியை வலுப்படுத்த கர்நாடகா வருகை தந்துள்ள பா.ஜ. தேசிய தலைவர் அமித்ஷா, சித்ரதுர்கா அருகே ஹோலாகரேவில்நடந்த பொதுக்கூட்டத்தில் பேசினார். அப்போது காங். முதல்வர் சித்தராமையா இந்துக்களுக்கு எதிராக செயல்படுகிறார். மாநிலத்தில் கடந்த மூன்று ஆண்டுகளில் பா.ஜ.மற்றும் ஆர்.எஸ்.எஸ். அமைப்பினர் என 22 பேர் கொல்லப்பட்டுள்ளனர். இந்த ஆட்சியில் இந்து தலைவர்களின் உயிருக்கு பாதுகாப்பு இல்லை. நடந்த கொலைகள் தொடர்பாக தேசிய புலனாய்வு ஏஜென்சி விசாரணை நடத்த வேண்டும் என பா.ஜ. தொடர்ந்து வலியுறுத்தி வருகிறது என்றார்.
இதற்கு காங்.முதல்வர் சித்தராமையா சாம்ராஜாநகராவில் செய்தியாளர்களுக்கு அளித்த பேட்டியில்,பா.ஜ.வின் குற்றச்சாட்டில் உண்மையில்லை. இம்மாநிலத்தில் பா.ஜ. ஆர்.எஸ்.எஸ். பஜ்ரங்தள் ஆகியவற்றிற்குள் தீவிரவாதிகள் உள்ளனர். மத மோதலை தூண்டும் வகையில் அவர்கள் செயல்படுவதை பொறுத்துக்கொள்ள முடியாது என்றார்.
