தொடரும் குளறுபடி நடிகர் சரவணன் படத்துடன் தொழிலாளிக்கு ஸ்மார்ட் கார்டு
10/26/2017 4:20:13 PM
ஜலகண்டாபுரம் : பொது விநியோகத் திட்டத்தை நவீனமாக மாற்றும் வகையில், பேப்பர் வடிவிலான ரேஷன் அட்டைகளுக்கு பதில் ஸ்மார்ட் கார்டுகள் வழங்கும் திட்டத்தை தமிழக அரசு அறிமுகப்படுத்தியது. இவ்வாறு வழங்கப்படும் கார்டுகளில் காணப்படும் புகைப்படம் மற்றும் முகவரி போன்றவற்றில் ஏற்பட்டுள்ள பிழையால் பொதுமக்கள் பெரும் சிரமத்திற்கு ஆளாகி வருவது தொடர் கதையாகியுள்ளது. கடந்த மாதம் ஓமலூர் அடுத்த காமலாபுரத்தை சேர்ந்த பெண்ணுக்கு நடிகை காஜல்அகர்வால் புகைப்படத்துடன் கூடிய ஸ்மார்ட் கார்டு வழங்கப்பட்ட சம்பவம் பெரும் பரபரப்பை ஏற்படுத்தியது.
இதன் தொடர்ச்சியாக தற்போது ஜலகண்டாபுரம் கம்போஸ்ட் ரோடு பகுதியை சேர்ந்த செல்வம் என்பவருக்கு வழங்கப்பட்டுள்ள ஸ்மார்ட் கார்டில், அவரது புகைப்படத்திற்கு பதிலாக நடிகர் சரவணனின் புகைப்படம் இடம் பெற்றிருப்பது அதிர்ச்சியை ஏற்படுத்தியுள்ளது. இதுகுறித்து ரேஷன் கடைக்காரரிடம் கேட்டபோது, உரிய ஆவணங்களுடன் கம்ப்யூட்டர் சென்டருக்கு சென்று சரிசெய்து கொள்ளுமாறு கூறியுள்ளார். இதுபோன்ற தவறுகள் தொடர்ந்து நடக்காத வகையில், ஸ்மார்ட் ரேஷன் கார்டு பிரின்ட் செய்யும்போதே தவறுகள் இருப்பின், அதனை திருத்தம் செய்து வழங்க அதிகாரிகள் உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
