பாட்டியை சந்திக்க இத்தாலி செல்லும் ராகுல்
6/14/2017 3:47:15 PM
புதுடெல்லி: தனது பாட்டியை சந்திக்க இத்தாலி செல்ல உள்ளதாக ராகுல் டுவிட்டரில் தெரிவித்துள்ளார்.ராகுல் காந்தி தனது 47வது பிறந்த தினத்தை முன்னிட்டு அதை வெளிநாட்டில் கொண்டாடுவதற்காக செல்கிறார். மேலும் தனது பாட்டி மற்றும் உறவினர்களை இத்தாலியில் சென்று சந்திக்க திட்டமிட்டுள்ளார். அவரது பாட்டி பாவ்லா மைனோ இத்தாலியில் வசித்து வருகிறார். இதுகுறித்து ராகுல் தனது டுவிட்டரில், பாட்டி மற்றும் உறவினர்களை சந்திப்பதற்காக இத்தாலி செல்கிறேன். அவர்களுடன் சிறிது நாட்கள் செலவழிக்க விரும்புகிறேன் என்று குறிப்பிட்டுள்ளார்.
ஆனால் எத்தனை நாட்கள் அவர் அங்கு தங்கி ஓய்வெடுக்கிறார் என்பது குறித்த விவரங்களை வெளியிட வில்லை. கடந்த மார்ச் மாதம் உடல் நலக் குறைவு காரணமாக அமெரிக்காவில் சோனியா சிகிச்சை பெற்ற போது ராகுல் சென்று உடன் இருந்தார்.
அதற்கு முன்னதாக புத்தாண்டின் போது சிறிது நாட்கள் அவர் லண்டன் சென்றிருந்தார். தற்போது நாடு முழுவதும் பரபரப்பான அரசியல் சூழல் மற்றும் ஜனாதிபதி தேர்தல் ஆகியவை வர உள்ள நிலையில் நாடாளுமன்ற கூட்டத் தொடருக்கு முன்னதாக சிறிது நாட்கள் வெளிநாட்டில் சென்று ஓய்வெடுத்து திரும்ப இருப்பதாக காங்கிரஸ் வட்டாரங்கள் தெரிவித்துள்ளன.
