நியூசிலாந்துக்கு எதிரான முதல் டெஸ்ட் - 133 ரன்னில் பாகிஸ்தான் ஆல் அவுட்
11/18/2016 4:31:51 PM
கிறைஸ்ட்சர்ச்: பாகிஸ்தான்-நியூசிலாந்து கிரிக்கெட் அணிகள் இடையேயான, முதல் டெஸ்ட் கிரிக்கெட் கிறைஸ்ட்சர்ச் நகரில் நேற்று தொடங்கியது. மழை காரணமாக முதல் நாள் ஆட்டம் ரத்து செய்யப்பட்டது. 2வது நாள் ஆட்டம் இன்று நடந்தது.
இதில், டாஸ் வென்ற நியூசிலாந்து அணி, பாகிஸ்தானை பேட்டிங் செய்யுமாறு கேட்டு கொண்டது.
இதன்பின் முதலில் களமிறங்கிய பாகிஸ்தான் அணி, நியூசிலாந்து பந்து வீச்சை தாக்கு பிடிக்க முடியாமல், முதல் இன்னிங்சில் 55.5 ஓவர்களில் 133 ரன்னுக்கு ஆல் அவுட்டானது. அதிகபட்சமாக கேப்டன் மிஸ்பா உல் ஹக் 31 ரன் எடுத்தார்.
அசார் அலி 15, சமி அஸ்லாம் 19, பாபர் அசாம் 7, யூனுஸ்கான் 2, ஆசாத் சபீக் 16, சர்ப்பராஸ் அகமது 7, முகமது ஆமிர் 3, சோகைல் கான் 9, ரகத் அலி 0 ரன்னில் விக்கெட்டை பறிகொடுத்தனர். யாசிர் ஷா 4 ரன்னுடன் களத்தில் இருந்தார்.
நியூசிலாந்து தரப்பில் மித வேக பந்து வீச்சாளரான கோலின் டி கிராண்ட்ஹோமி 6, வேகப்பந்து வீச்சாளர்கள் சவுத்தி, போல்ட் தலா 2 விக்கெட் வீழ்த்தினர். இதன்பின் முதல் இன்னிங்சை தொடங்கிய நியூசிலாந்து அணி 3 ஓவர்கள் முடிவில் 2 ரன் எடுத்திருந்தது. லதாம், ரவால் தலா 1 ரன்னுடன் களத்தில் இருந்தனர்.
அறிமுக போட்டியில் அசத்திய கிராண்ட்ஹோமி
15.5 ஓவர்கள் பந்து வீசி 41 ரன்களை மட்டும் விட்டுகொடுத்து 6 விக்கெட் கைப்பற்றிய நியூசிலாந்து வீரர் கோலின் டி கிராண்ட்ஹோமிக்கு இது அறிமுக டெஸ்ட் போட்டியாகும். இதன் மூலம் அறிமுக போட்டியில் சிறப்பாக பந்து வீசிய நியூசிலாந்து பந்து வீச்சாளர் என்ற பெருமையை அவர் பெற்றார். முன்னதாக 1951ம் ஆண்டில் அலெக்ஸ் மோயர் 155 ரன்னுக்கு 6 விக்கெட் வீழ்த்தியதே, அறிமுக போட்டியில், நியூசிலாந்து வீரர் ஒருவரின் சிறந்த பந்து வீச்சாக இருந்தது. இதனுடன் அறிமுக போட்டியில், 5 அல்லது அதற்கு மேல் விக்கெட் வீழ்த்திய 8வது நியூசிலாந்து வீரர் என்ற பெருமையையும் அவர் பெற்றார். இதனுடன் நியூசிலாந்து மண்ணில் பாகிஸ்தானின் 3வது குறைந்தபட்ச ஸ்கோராக இது அமைந்தது. முன்னதாக 2000-01ல், ஹாமில்டனில் நடந்த போட்டியில், 104 மற்றும் 118 ரன்னுக்கு பாகிஸ்தான் ஆல் அவுட்டாகியிருந்தது.
